សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី២៨ ខែកញ្ញា ឆ្នាំ២០២៦នេះ បានអញ្ជើញចុះត្រួតពិនិត្យ និងសួរសុខទុក្ខប្រជាពលរដ្ឋរងគ្រោះដោយទឹកជំនន់ នៅខេត្តបន្ទាយមានជ័យដោយផ្ទាល់។ ការចុះអន្តរាគមន៍ភ្លាមៗនេះ ធ្វើឡើងដើមី្បលើកទឹកចិត្តប្រជាពលរដ្ឋ និងរៀបចំវិធានការជួយសង្គ្រោះឱ្យបានទាន់ពេលវេលា។

ប៉ៃលិន ៖ យប់ថ្ងៃទី២៨ ខែកញ្ញា ឆ្នាំ២០២៦ លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន និងជាប្រធានគណៈកម្មាធិការគ្រោះមហន្តរាយខេត្ត បានអញ្ជើញចុះសួរសុខទុក្ខ និងជួយសង្គ្រោះបន្ទាន់ប្រជាពលរដ្ឋ ដែលរងផលប៉ះពាល់ដោយសារជំនន់ទឹកភ្លៀង នៅឃុំស្ទឹងត្រង់ ស្រុកសាលាក្រៅ ខេត្តប៉ៃលិន។

(ប៉ៃលិន)៖ លោក ញ៉ឹប បូរី ប្រធានមន្ទីរព័ត៌មានខេត្តប៉ៃលិន បានដឹកនាំមន្ត្រីរាជការ នៃមន្ទីរព័ត៌មានខេត្ត ដែលជាក្រុមការងារព័ត៌មាន និងសាធារណៈមតិខេត្ត ចូលរួមកិច្ចប្រជុំពីចម្ងាយតាមប្រព័ន្ធវីដេអូ Zoom ក្រោមអធិបតីភាពដ៏ខ្ពង់ខ្ពស់របស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ដើម្បីទទួលបានការតម្រង់ទិស លើការងារផលិតបទយកការណ៍ ស្តីពី សមិទ្ធផលនានាដែលរដ្ឋបាលឃុំ-សង្កាត់សម្រេចបានកន្លងមក។

ព័ត៌មាន ទទក ប៉ៃលិន៖ នារសៀលថ្ងៃទី២៦ ខែកញ្ញា ឆ្នាំ២០២៦ លោកជំទាវបណ្ឌិត បាន ស្រីមុំ អភិបាល គណៈអភិបាលខេត្តប៉ៃលិន និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត បានដឹកនាំ មន្ត្រីជំនាញ និងអាជ្ញាធរមូលដ្ឋាន អញ្ជើញចុះពិនិត្យស្ថានភាពជាក់ស្តែង ព្រមទាំងនាំយក អំណោយ សង្គ្រោះបន្ទាន់ ទៅចែកជូនប្រជាពលរដ្ឋរងផលប៉ះពាល់ដោយសារជំនន់ទឹកភ្លៀង នៅឃុំស្ទឹងត្រង់ ស្រុកសាលាក្រៅ ខេត្តប៉ៃលិន បន្ទាប់ពីភ្លៀងបានធ្លាក់ជោកជាំជាបន្តបន្ទាប់ បង្កឱ្យលិចលង់ផ្ទះសម្បែង ហេដ្ឋារចនាសម្ព័ន្ធ និងដំណាំកសិកម្ម។

ព័ត៌មាន ទទក ប៉ៃលិន៖ ដើម្បីដោះស្រាយបញ្ហាប្រឈម នៃគ្រោះជំនន់ទឹកភ្លៀង និងការពារហេដ្ឋារចនាសម្ព័ន្ធផ្លូវថ្នល់ នាព្រឹកថ្ងៃទី២៦ ខែកញ្ញា ឆ្នាំ២០២៦ លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន បានអញ្ជើញដឹកនាំមន្ត្រីជំនាញពាក់ព័ន្ធ និងអាជ្ញាធរមូលដ្ឋាន ចុះពិនិត្យមើលស្ថានភាពវឌ្ឍនភាព នៃការស្ដារប្រឡាយរំដោះទឹក នៅអមសងខាងផ្លូវជាតិលេខ ៥៧ ក្នុងភូមិសាស្ត្រខេត្តប៉ៃលិន សំដៅពន្លឿនលំហូរទឹកឱ្យបានលឿន និងទប់ស្កាត់ការជន់លិចភូមិឋានរបស់ប្រជាពលរដ្ឋនៅរាល់ពេលមានភ្លៀងធ្លាក់។

ប៉ៃលិន៖ លោកជំទាវ សុក សារី សមាជិកាក្រុមប្រឹក្សាខេត្តប៉ៃលិន និងលោក សោ សុវណ្ណ អភិបាលរង នៃគណៈអភិបាលខេត្តប៉ៃលិន បានដឹកនាំមន្ត្រីរាជការ និងពុទ្ធបរិស័ទ អញ្ជើញចូលរួមកាន់បិណ្ឌវេនទី១ ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ នៅវត្តរតនសោភ័ណ (ហៅវត្តកោងកាង) ស្ថិតក្នុងភូមិវត្ត សង្កាត់ប៉ៃលិន ក្រុងប៉ៃលិន ខេត្តប៉ៃលិន ដើម្បីឧទ្ទិសកុសលជូនបុព្វការីជន និងប្រមូលបច្ច័យសម្រាប់ទ្រទ្រង់វិស័យព្រះពុទ្ធសាសនា។ ក្នុងពិធីបុណ្យដ៏មហោឡារិកនេះ ថ្នាក់ដឹកនាំ មន្ត្រីរាជការ ព្រមទាំងពុទ្ធបរិស័ទជិតឆ្ងាយ បានរួមសាមគ្គីគ្នាយ៉ាងផុសផុល ដោយបាននាំយកទេយ្យវត្ថុ គ្រឿងឧបភោគ បរិភោគ ព្រមទាំងបច្ច័យបូជាចំពោះព្រះសង្ឃ។ ជាលទ្ធផល ពិធីកាន់បិណ្ឌវេនទី១ នេះ ប្រមូលបច្ច័យសរុបបានចំនួនជាង ៥លានរៀល សម្រាប់តម្កល់ទុកកសាង និងអភិវឌ្ឍសមិទ្ធផលនានាក្នុងបរិវេណវត្តឱ្យកាន់តែរីកចម្រើន។