ព័ត៌មានតាមបណ្តារខេត្ត

ឯកឧត្តម មីន អោង ឡាំង (Min Aung Hlaing) ប្រធានាធិបតី នៃសាធារណរដ្ឋសហភាពមីយ៉ាន់ម៉ា អញ្ជើញក្រាបថ្វាយបង្គំ សមេ្តចព្រះអភិសិរីសុគន្ធាមហាសង្ឃរាជាធិបតីកិត្តិឧទេ្ទសបណ្ឌិត បួរ គ្រី សមេ្តចព្រះមហាសង្ឃរាជនៃគណៈធម្មយុត្តិកនិកាយ នៃព្រះរាជាណាចក្រកម្ពុជា នៅវត្តស្វាយពពែ រាជធានីភ្នំពេញ នាព្រឹកថ្ងៃទី១២ ខែកញ្ញា ឆ្នាំ២០២៦ ក្នុងឱកាសដែលឯកឧត្តមប្រធានាធិបតីអញ្ជើញមកបំពេញទស្សនកិច្ចផ្លូវរដ្ឋរយៈពេលពីរថ្ងៃនៅព្រះរាជាណាចក្រកម្ពុជា។

សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជា អញ្ជើញទទួលបដិសណ្ឋារកិច្ចស្វាគមន៍ ដំណើរទស្សនកិច្ចផ្លូវរដ្ឋរបស់ ឯកឧត្តម មីន អោង ឡាំង (Min Aung Hlaing) ប្រធានាធិបតីនៃសាធារណរដ្ឋសហភាពមីយ៉ាន់ម៉ា មុនជំនួបកិច្ចប្រជុំកំពូល នៅវិមានសាមគ្គីភាពនៃព្រឹទ្ធសភា នាព្រឹកថ្ងៃទី១១ ខែកញ្ញា ឆ្នាំ២០២៦។

នារសៀលថ្ងៃទី១១ ខែកញ្ញា ឆ្នាំ២០២៦ នៅវិមានសន្តិភាព, សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានជួបពិភាក្សាការងារទ្វេភាគី ជាមួយឯកឧត្តម មីន អោង ឡាំង (Min Aung Hlaing) ប្រធានាធិបតីនៃសាធារណរដ្ឋសហភាពមីយ៉ាន់ម៉ា និងគណៈប្រតិភូជាន់ខ្ពស់ ក្នុងដំណើរទស្សនកិច្ចផ្លូវរដ្ឋ នៅព្រះរាជាណាចក្រកម្ពុជា ចាប់ពីថ្ងៃទី១១ ដល់ថ្ងៃទី១២ ខែកញ្ញា ឆ្នាំ២០២៦។

ប៉ៃលិន៖ ឯកឧត្តម ឌឹន គឹម នាយកប្រតិបត្តិសាខាកាកបាទក្រហមកម្ពុជាខេត្តប៉ៃលិន បានដឹកនាំមន្ត្រីប្រតិបត្តិក្រោមឱវាទចំនួន ៣នាក់ (ស្រី ២នាក់) ចូលរួមកិច្ចប្រជុំបូកសរុបលទ្ធផលការងារយុវជន និងអ្នកស្ម័គ្រចិត្តកាកបាទក្រហមកម្ពុជា ប្រចាំឆមាសទី១ ឆ្នាំ២០២៦ និងលើកទិសដៅអនុវត្តបន្ត កាលពីថ្ងៃទី១១ ខែកញ្ញា ឆ្នាំ២០២៦ កន្លងទៅនេះ។

(ប៉ៃលិន)៖ នៅថ្ងៃទី១១ ខែកញ្ញា លោកស្រី ទន់ ស៊ីម៉េន ចៅសង្កាត់ទួលល្វា បានដឹកនាំក្រុមការងារមូលដ្ឋាន ដែលរួមមាន ស្មៀនសង្កាត់ នាយប៉ុស្តិ៍រដ្ឋបាលសង្កាត់ លោកមេភូមិ អនុភូមិ និងសមាជិកភូមិ ចុះផ្ទាល់តាមខ្នងផ្ទះ ដើម្បីស្រង់ទិន្នន័យ ធ្វើបច្ចុប្បន្នភាពព័ត៌មាន និងបំពេញប្រវត្តិរូប ជូនអតីតយុទ្ធជន នៅក្នុងសង្កាត់ទួលល្វា ដោយសកម្មភាពនេះសម្រេចបានចំនួន ២ភូមិ ដែលមានអតីតយុទ្ធជនសរុប ១៤គ្រួសារ គឺភូមិ ទួលស្រឡៅ បានចំនួន៩គ្រួសារ និងភូមិ ទួលនិម្មិត ចំនួន៥គ្រួសារ ។

(ប៉ៃលិន)៖ រសៀលថ្ងៃទី១១ ខែកញ្ញា ឆ្នាំ២០២៦ លោក ងួន លីណា អភិបាលរងខេត្តប៉ៃលិន និងជាអនុប្រធានអចិន្ត្រៃយ៍គណ:កម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធខេត្ត បានអញ្ជើញដឹកនាំលោក-លោកស្រី ដែលជាអនុប្រធាន សមាជិក សមាជិកា និងលេខាធិការដ្ឋាន នៃគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធខេត្តប៉ៃលិន ចូលរួមវគ្គបណ្ដុះបណ្ដាលស្តីពី «នីតិវិធីនៃការចុះឈ្មោះអ្នកសេដ្ឋកិច្ចក្រៅប្រព័ន្ធ និងផ្សព្វផ្សាយកញ្ចប់អត្ថប្រយោជន៍ សម្រាប់អ្នកសេដ្ឋកិច្ចក្រៅប្រព័ន្ធ» ដែលកម្មវិធីនេះ បានប្រព្រឹត្តទៅក្រោមអធិបតីភាព ឯកឧត្តម ម៉ាត សារី អនុរដ្ឋលេខាធិការ និងជាប្រធានលេខាធិការដ្ឋាននៃគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ តាមរយៈប្រព័ន្ធអនឡាញ (Zoom Cloud Meeting) ដោយមានសមាសភាពចូលរួមសរុបចំនួន ៣៨ នាក់ ។

(ប៉ៃលិន)៖នៅថ្ងៃសុក្រ ១៤ រោច ខែស្រាពណ៍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១១ ខែកញ្ញា ឆ្នាំ២០២៦ វេលាម៉ោង០៨:៣០នាទី ដោយអនុវត្តនូវអនុសាសន៍ដឹកនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងមានការចង្អុលបង្ហាញពី លោកឧត្តមសេនីយ៍ទោ សេង សុគន្ធ ស្នងការ នៃស្នងការដ្ឋាននគរបាលខេត្តប៉ៃលិន លោកវរសេនីយ៍ទោ មាឃ សារ៉ន អធិការនគរបាលក្រុងប៉ៃលិន បានចាត់ឲ្យកម្លាំងក្រោមឱវាទ ចូលរួមសហការជាមួយរដ្ឋបាលក្រុងប៉ៃលិន និងអជ្ញាធរមូលដ្ឋាន ធ្វើការចុះផ្សព្វផ្សាយគោលនយោបាយភូមិ-ឃុំ-សង្កាត់មានសុវត្ថិភាពទាំង៧ចំណុច ស្ថិតនៅភូមិប៉ាហ៊ីត្បូង សង្កាត់ប៉ៃលិន និងភូមិក្រចាប់ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។

(ប៉ៃលិន)៖ នៅសាលាបឋមសិក្សាក្ងោក នាព្រឹកថ្ងៃទី១១ ខែកញ្ញា ឆ្នាំ២០២៦ ក្រុមការងាររាជរដ្ឋាភិបាលចុះមូលដ្ឋានស្រុកសាលាក្រៅ បានបើកវេទិកាសាធារណៈថ្នាក់ស្រុក ក្នុងគោលបំណងដើម្បីបង្កើតឱកាសជួបប្រាស្រ័យទាក់ទង ដោយផ្ទាល់រវាងថ្នាក់ដឹកនាំ មន្ត្រីរាជការ អាជ្ញាធរដែនដី និងប្រជាពលរដ្ឋ នៅតាមមូលដ្ឋាន ដែលពិធីនេះស្ថិតក្រោមអធិបតីភាពឯកឧត្តម កឹម សុខុន រដ្ឋលេខាធិការ ក្រសួងពាណិជ្ជកម្ម និងជាប្រធានក្រុមការងារ រាជរដ្ឋាភិបាលចុះមូលដ្ឋានស្រុកសាលាក្រៅ ព្រមទាំងមានការអញ្ជើញចូលរួមពីអនុប្រធាន និងសមាជិកក្រុមការងាររាជរដ្ឋាភិបាលចុះមូលដ្ឋានស្រុកសាលាក្រៅ, ក្រុមប្រឹក្សាស្រុក, គណៈអភិបាលស្រុក, កងកម្លាំងប្រដាប់អាវុធទាំងបីប្រភេទ, លោក-លោកស្រីប្រធាន-អនុប្រធានមន្ទីរជុំវិញខេត្ត,លោក-លោកស្រីអភិបាលរងស្រុក លោកនាយក-នាយករងរដ្ឋបាលស្រុក, ប្រធានការិយាល័យ/អង្គភាពជុំវិញស្រុក, អាជ្ញាធរឃុំ-ភូមិ និងប្រជាពលរដ្ឋ ក្នុងមូលដ្ឋានយ៉ាងច្រើនកុះករ។

ដូចអ្នកបានជ្រាបរួចមកហើយពីមូលហេតុដែលបង្កឱ្យឈឺខ្នង ដែលរួមមាន សម្ពាធលើសាច់ដុំ ឬសរសៃចងឆ្អឹង រលាកសន្លាក់ កោងខ្នង ជាដើម។ តែបើអ្នកឈឺឆ្អឹងខ្នងរហូតលេចចេញអាការបែបនេះ សូមប្រញាប់រុះរាន់ទៅជួបជាមួយគ្រូពេទ្យជាបន្ទាន់ ព្រោះវាមិនមែនជាការឈឺឆ្អឹងខ្នងធម្មតានោះទេ វាអាចជារោគសញ្ញានៃជំងឺធ្ងន់ធ្ងរណាមួយដែលកំពុងតែមាន ឬវិវត្តក្នុងរាងកាយរបស់យើង។

សូមទស្សនាវីដេអូរបទយកការណ៍៖ «ភាពកក់ក្តៅ និងទំនុកចិត្តរបស់ស្ត្រីមានផ្ទៃពោះ លើសេវាសុខាភិបាលនៅមណ្ឌលសុខភាពក្រចាប់ ខេត្តប៉ៃលិន» ផលិតដោយ មន្ទីរព័ត៌មានខេត្តប៉ៃលិន

(ប៉ៃលិន)៖ ព្រឹកថ្ងៃទី១០ ខែកញ្ញា ឆ្នាំ២០២៦ មន្ត្រីជំនាញ នៃមន្ទីរពាណិជ្ជកម្មខេត្តប៉ៃលិន ដឹកនាំដោយលោក រុន ធី ប្រធានការិយាល័យគ្រប់គ្រងអាជីវកម្ម និងលោកស្រី ដួង សុកេត អនុប្រធានការិយាល័យ បានសហការជាមួយសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ខេត្តប៉ៃលិន ដឹកនាំដោយលោក ឈិម វាសនា ប្រធានសាខាខេត្ត ចុះត្រួតពិនិត្យដោយផ្ទាល់ នៅតាមទីតាំងអាជីវកម្មចំនួន ៣កន្លែង គឺជាផ្សារម៉ាតចិន ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ក្នុងគោលបំណង ដើម្បីការពារសុខភាព និងសុវត្ថិភាព របស់អ្នកប្រើប្រាស់ ដោយទប់ស្កាត់ការដាក់តាំងលក់ទំនិញខូចគុណភាព ឬហួសកាលបរិច្ឆេទកំណត់។

(ភ្នំពេញ)៖ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកអគ្គនាយកស៊ីម៉ាក់ (CMAC) នៅថ្ងៃទី១០ ខែកញ្ញា ឆ្នាំ២០២៦ បានបង្ហោះផ្សាយនៅលើបណ្តាញសង្គមថា សម្រែកយុត្តិធម៌សម្រាប់ប្រាសាទព្រះវិហារដែលជាមរតកដូនតាខ្មែរនិងជាសម្បតិ្តបេតិកភណ្ឌពិភពលោកត្រូវបានលាតត្រដាងជាបណ្តើរៗហើយ។